أحمد افندى محمد حامد عبد العال
صاحب عيلة جسيمة مراته و ست عيال
عنده اسم الله حسن و حسين وسعيد و نوال
والمقروصة نفيسة وقدم الخير وصال
***
أحمد افندى مدرس عربى قديم ومتين
شكله تشوفه
تقول على طول من اهل الدين
شايل سبحة خشب البندق
م الغاليين
ساعه تلف يمين
وسواعى تلف شمال
***
غير السبحة
طالعه زبيبه ف قورته كمان
يعنى دليل
على انه بيسجد للرحمن
هيبه و تقوى
ومظهر ناطق بالايمان
ثم المشيه عليها القيمه
وفيها جلال
***
احمد افندى
ساكن شقه فى رابعدور
بيت الحاج عويس
ومراته الست بدور
كانوا حبايب قبل ما يتأتى المقدور
ساعة نحس اتقلب البيت
واتبدل الحال
***
ابن الحاج عويس
كان عامل كوره شراب
والعصريه
نازل يلعب جنب الباب
جاى بيشوط
قام طارت فرده من القبقاب
جت فى زبيبة احمد افندى
و دمها سال
***
ضحكت عيشه مرات السقا
و قالت يوة
ظاطوا عيال الحارة وقالوا
الجردل اهو
احمد افندى فوت عقله
ما بقاش له
رقع الواد قلمين سخنين
كومه فى الحال
***
صرخت نوسة مرات
محمود عبدالجواد
كبدى يا خويا
يا ناس الراجل قتل الواد
نزل السيد سالم يجرى
وقال يا ولاد
اوعوا الراجل يفلت منكوا
دا موته حلال
***
احمدافندى زعق من تحت
وقال يا حسين
هات سكينه ونزل اخوك
ومعاك شومتين
نزلوا العيلة
واشتغل الضرب شمال ويمين
والصوت لعلع والنبابيت
غنت موال
***
خش محمد مرسى يخلص فى الموضوع
خد سكينه ف جنبه
وكان عيان موجوع
وقع ع الارض يئن
وعينه تشر دموع
هي ثوانى وطلعت روحه للمتعال
***
هاجوا العالم
والنسوان فقعت بالصوت
وامه تقول
ياحبيبى ازاى دهولك الموت
واحمد افندى لم عياله
و على برغوت
طلب النجدة من تليفون عبده البقال
***
وصل النجده
لقى حوالين الجثه اتنين
اخته بتلطم
وامه بتتمرغ فى الطين
سأل الظابط
فين امال المتخانقين
قالت نوسة من شباكها
دا أبو وصال
***
طلعت هجمه
ان شاء الله ما حد يشوفها يا ناس
رزعوا الباب فشخوه اتنين
طارالترباس
خبط الحله ..قلبها
وساح منها القلقاس
عاص القله
ولغمص وش البتنوال
***
احمد افندى
وقف على حيله وقال جرى ايه
انت ازاى تتهجم كده على بيتى يا بيه
لاشه الظابط
جريوا عياله و خافوا عليه
حسن اترمى على ابوه
واتشعلق في وصال
***
امر الظابط للشرطيه بالتفتيش
واللى حيعتر فى السكينه حيبقى شاويش
بعد ما لفوا اوضها وداخوا
وقالوا مفيش
لمح الظابط دم مبقع
جنب شوال
***
زغد المخبر
وقاله ازاى بتقول فتشت
جرى من خوفه اتكعبل
كوع جنب الطشت
لحقه زميله وقال جرى ايه
مالك طبشت
تيس قام مش قادر
حتى يرد سؤال
***
مخبر تانى
عشان موعود يترقى شاويش
فرد المطوة
و هم يمزع بيها الخيش
اول خبطه اتخض
وقال يا خبر
دا حشيش
احمد افندى وقع من طوله
فشر تمثال
كانت نزله
ان شاءالله ما حد يشوفها يا هوه
احمد افندى
قفاه من حيل الضرب هاروه
وهوب شالوه
و ف قلب البوكس رموه
و ام عياله تقوله
يا سبع البيت ياغزال
***
ضحكت عيشه مرات السقا
وقالت يوه
ظاطوا عيال الحارة و قالوا
المجرم اهوه
احمد افندى فوت عقله
ما بقاش له
صار يلطم على وشه يقول
حبسونى عيال
02-10-2009, 07:37 AM
أحمد افندى محمد حامد عبد العال للشاعر الكبير احمد فؤاد نجم
المواضيع المتشابهه
العرض العادي
