دستور ..........ايمان بكري

دستور يا اخوانا يا بعدا
لاء سوري دستور م البعدا
محبوس حابس يا اسيادنا
و بكاكي من فوق مادنة
و و رايا ديوك بيكاكو
حرصوا ع الباقي معاكو
بركة مولانا هولاكو
حلت و علينا اللعنه

طرطور طرطر طراطير
بيغيروا في الدساتير
و لا عاد في الحته كبير
و يا وارث تروث مين
ما الورث اتباع و اتباعنا
نرجع تاني لموضوعنا

و بيان لديارالإافتا
من جمهورية زفته
لعبه و عملوها استفتا
صوت ياللي انت سامعنا
و قول
ملك ولا كتابه
اسد شبل في الغابه
و احلف و حياة راس بابا
زفه ف مولد كذابه
و الله يجازي اللي خدعنا

للجوكر الف تحيه
ملعون خاشي الحريه
يحيا قانون العبوديه
و الحكومات الشموليه
و القوانين الوضعيه
لها مني الف تحيه
و حياة امي دي رجعيه
لو صوتنا علي و جعجعنا
واحد ولافيش غير هو
قاعد متربع جوه
و بكيفك قرب القوه
لو عامل فيها فتوه
روح قوله بقى يودعنا
مزيكا و ترابتوه
و نفديك بالدم ....افدوه
بس احنا و رحمة ابوه
مين ده اللي حيلوي دارعنا

روح هاتلي لمون بالصودا
انا حاسه بريحة شوطه
حيصعدوا فصل الروضه
و الورث حيصبح موضه

لم الجدعان و اتبعنا
على قهوة ساقية مكي
نلطم نصرخ و حنبكي
ده ناويها و بتكتكلي
قبل ما حتى يودعنا

زقططوا يا عيال هو هيه
الحكم صبح تيك اوي
لو عايز قول اوكيه
لو رافض قول اوكيه
في كلا الحالتين نو وياي
غير كوديه و زار ينفعنا

انا عايزه بخور م الجاوي
و حمار ارمل و حصاوي
و دراع برغوت مش غاوي
تنطيط عفريت و مخاوي
شلة مقاطيع يقطعنا

حابس من شر الكرسي
من شر عزيزه و مرسي
من قرص النمل الفارسي
من الاحياء و الاموات
من كايرو الى بغداد

اشتات اشتوت اشتات
حرصوا من لعب السيكا
م الحكشه و م البولتيكا
و لا تشمت يوما فيكا
مارشيل بنت ام ماريكا
قول حاجه الله يهديكا
و ادعي معايا يخليكا
حلوا بقى عن اوجاعنا
و انصرفوا عليكو اللعنه
انصرفوا عليكو اللعنة